LEGAZPI CITY-Padagos na nagkukusog an bagyong Gorio na ngonian na nasa typhoon category mantang naghihiro pa-kanluran sa Philippine Sea.
Segun sa pinakahuring datos, an sentro kan bagyo nasa rayong 745 kilometro, sirangan kan Itbayat, Batanes, asin dara kaini an kusog na nagaabot sa 120 kilometro kada oras asin pagbugso kan paros na hasta 150 kilometro kada oras.
Laoman na hababa an posibilidad na direktang makaapektar si Gorio sa nacion sa laog kan masunod na tulong araw, alagad dai ipinagsasawarang bahala an posibilidad na paghalangkaw kan Tropical Cyclone Wind Signal sa Extreme Northern Luzon enkaso magbago an direksyon kan bagyo pa-timog.
Sa presente, laoman na magpapadagos an bagyo sa direksyong west-northwest asin posibleng mag-landfall sa sirangang baybayon kan Taiwan saagang hapon, Agosto 13, bago ini tuluyang magluwas sa Philippine Area of Responsibility ngonian na banggi.
Huli sa epekto kan bagyo, laoman man an magaspang na kadagatan sa seaboards kan Batanes na may taas kan alon na hasta 5.5 metro, kaya pigpapayuhan an gabos na klase nin sasakyang pandagat na dai muna magpalaot.
Magaspang man an madadanasan na kadagatan sa norte asin sirangang parte kan Babuyan Islands na may alon na hasta 3.5 metro, kung sain peligroso an paglalayag para sa mga saradit na bangka.
Katamtaman man an alon sa natatadang parte kan Babuyan Islands, hilagang-silangang Cagayan, Isabela, asin hilagang-silangang Aurora, asin pigpapayuhan an mga parasisira asin mariners na mag-ingat asin, kung pwedisir na ibitaran muna an paglalayag.
