LEGAZPI CITY—Nakumpiskar kan Philippine Drug Enforcement Agency Bicol an nasa haros 10 kilo nin shabu puon kan bulan nin Enero sagkod Hunyo ngunyan na taon.
Segun ki PDEA Regional Office 5 Regional Director Atty. Jacquelyn L. De Guzman, sa intrevista kan Bombo Radyo Legazpi, basado sa saindang inventory nasa 10,641 gramos nin shabu asin 84,484 gramos nin marijuana an nakumpiskar sa bilog na rehiyon.
Mantang maabot sa 80 high value target individuals an naarestar saindang mga operasyon.
Afuera digdi nakapagkundusir man nin 21 high-impact operations an nasabing ahensya.
Sa enot na parte kan taong 2025, pinakadakol na nakumpiskar na marijuana sa provincia kan Camarines Sur kun saen nag-abot ini sa haros 84 kilos, mantang pag-abot sa pinakadakol na nakumpiskar na shabu an Camarines Norte asin Camarines Sur.
Dugang kan opisyal na sa presente, nasa 10.14% affectation kan bilog na Bicol pag-abot sa drug clearing, kun saen may pinakahalangkaw na affectation an Naga City.
Mientrastanto, pangapudan kan opisyal sa publiko na en kaso may aram sinda na mga indibidwal na naiimbuelto sa ilegal na droga na makipagkoordinar sa saindang ahensya nganing maaksyunan ninda ini.
Preparado suboot sindang tabangan an mga indibidwal na mawot na magbagong-buhay na minsan nang naimbuelto sa siring na ilegal na aktibidad.
