Sarong paratukdo an binadil kan sadiri niyang estudyante sa laog kan campus kan Balabagan Trade School sa Barangay Narra, Balabagan, Lanao del Sur.
Binisto an biktima na si Danilo Barba, 34-anyos na suboot binadil makalihis na bagsakon kaini sa sarong subject si alyas Kaizer, 20-anyos na Grade 11 student.
Sa report kan Balabagan Municipal Police Station, mismong pigtuga kan suspek an ginibong krimen huli sa grabeng dagit kaini sa paratukdo na nagbagsak saiya.
Palaog na kuta si Barba sa campus kan pugulan siya kan suspetsado asin binadil sa payo gamit an calibre .45 pistol na tulos kaining ikinagadan.
Makalihis an nagibong krimen an nagtago an suspetsado sa saindang mga kaparyentes sa Marogong kan kaparehong banwaan.
Alagad, sa tabang kan saiyang tugang na sarong pulis, boluntad siyang nagsuko sa mga awtoridad kan suminunod na aldaw.
Napag-araman na bako sana an biktima an nagbagsak sa suspetsado kundi igwa pang ibang mga paratukdo na posibleng target kaini, alagad ipinaliwanag ni alyas Kaizer na si Barba sana an nauuyaman kaini.
Huli sa nangyari, an mga pulis asin soldados ipinadara nganing magtabang sa pagbantay sa eskwelahan.
