LEGAZPI CITY—Arestado an sarong lalaki na kaiba sa listahan kan “City Most Wanted Persons” kan Tabaco City sa ikinundusir na operasyon kan mga otoridad sa Marilao, Bulacan.
Binisto an suspek na si alyas “Ricky”, 45-anyos, asin residente kan San Miguel Island, Tabaco City.
Naarestar an suspek huli sa bisa kan apat na mandamiento de aresto na ipinaluwas kan manlaen-laen na korte sa nasambitang ciudad.
An suspek nahahampang sa 2 counts nin Acts of Lasciviousness na may P180,000 pigrekomendang piyansa kada saro; Lascivious Conduct na may pigrekomendang piyansa na P200,000; saro pang kaso nin Acts of Lasciviousness na may pigrekomendang piyansa na P180,000; asin saro pang kaso nin Lascivious Conduct na may pigrekomendang piyansa na P200,000.
Nasa kustodiya na kan Tabaco City Police Station an suspek para sa magkakanigong disposisyon.
