LEGAZPI CITY – Nagin magayon an turn-out kan Commission on Elections Bicol sa nagpapadagos na nationwide voters registration.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na dae ninda pighuna na maruso an mga mawot magparehistro asin nag-eextend na sinda nganing ma-akomodar an gabos.
Maski na-isakripisyo suboot an saindang oras an maugma sinda huli ta mas lalong nagdakol an registrants kun sain nagpapakol na sa 23,000 na mga voters registrant an saindang na-akomodar sa laog nin sarong aldaw.
Naghagad man siya nin pagsabot sa mga nagpipila huli ta regular asin sk voters an saindang pig-aakomodar na haros nagdoble kompara sa mga voters registration kan mga nakaaging taon.
Pigtaram pa kan opisyal na basado sa saindang datos an napag-araman na hale sa 137,120 na kabilugang nagparehistro sa rehiyon an 95,000 sa mga ini an may edad 15-17 anyos.
Nairehistro man ninda sa Legazpi City an may pinakahalangkaw na nagpaparehistro na nag-aabot 600 sagkod 700 voters registrant sa ibong kan kadiit na machine asin kakulangan nin personahes.
Nagdeploy na man sinda nin mga personahes na hale sa mga regional asin provincial offices kan komisyon nganing magtabang sa huring aldaw kan voters registration na piglalaomang mas dakol an mapila nganing magparehistro.
Pighayag man ni Valeza na dinaog na kan Rehiyon Bicol an Region 7 asin National Capital Region sa numero kan mga nagparehistro kun kaya nahiling ninda an paghingoa kan mga jovenes na makisumaro sa Baranggay and Sangguniang Kabataan Elections.
