LEGAZPI CITY – Kinondena kan sarong Media and Communication Professor an suboot pag-ban kan Senado sa mga nagkapirang independent media outlets sa pag-cover sa kakatapos pa sanang botohan kan articles of Impeachment ni Vice President Sara Duterte.
Segun ki University of the Philippines College of Mass Media and Communication Professor Danilo Arao sa intrevista kan Bombo Radyo Legazpi na may kadiit na restriction talagang nangyari huli ta may mga media na nag-cover na nakabase sa mismong pigtataong camera kan Senado.
Pigpunto niya na sadit an espasyo kan plenary hall alagad nagigibuhan dapat nin paagi nganing makatao nin espasyo para sa camera asin mga peryodista o kun kaya inagi na sana sa bunutan o draw lots nganing maaraman kun siisay sana an pwedesir maglaog.
Importante suboot na dakol an nagcocover kan sarong session nganing makapili man an publiko kan media na mapagkakatiwalaan mo asin pwedesir na ma-purnada an coverage enkaso magpalyar an sarong camera sa pagkuwa nin mga live footage.
Dugang pa kan professor na kun nasa laog kan plenaryo an sarong peryodista an makukuwa kaini an mahiwas na impormasyon asin reaksyon kan mga audience na dae nahahagip kan live feed.
Sa hiling niya man an maluya an nagin rason ni Senate Presidente Escudero na kadakol suboot na bisita kun kaya dae na natawan espasyo an ibang media outlet huli ta dapat nakatagama na ini bago pa magpoon an mismong session.
Pagdoon niya pa magayon na nahihiling sa coverage an reaksyon kan mga audience urog na sa mga kakaiba o maka-ulok na pahayag o speech kan mga senador na dae nakukuwa kan camera kan Senado.
Nilinaw man ni Arao na dae na dapat mautro an kaparehong insidente asin dapat na-ipapaotob an access sa impormasyon huli ta nagluluwas lugod na restriction ini sa independyenteng pamamahayag.
