LEGAZPI CITY – Papahiguton pa kan Legazpi City Smoke Free Unit an saindang kampanya asin ordinansa kontra sa paninigarilyo sa mga pampublikong lugar.
Segun ki Legazpi City Smoke Free Unit Team Leader Jose Balbin sa intrevista kan Bombo Radyo Legazpi na nagsagibo na sinda nin pag-oolay kaiba si City Mayor Hisham Ismail nganing diskutiron an mga problema asin dapat na gibuhon ngonian nin taon.
Nagpahayag man suboot sainda nin suporta an alkalde sa pagpapa-otob kan ordinansa asin pagsusunad ninda ki complaint sa city prosecutors office.
Basado man sa saindang datos an uminabot na sa 18 indibidwal an nasunadan na ninda nin reklamo huli sa dae pag-settle kan saindang mga violation sa laog nin 72 oras o 3 aldaw.
Pigtaram pa kan opisyal na maluwag pa man an saindang ipigtataong konsiderasyon huli ta makalihis an tulong aldaw an pigtatawan liwat an mga violator nin 15 aldaw nganing mag-settle o magbayad kan saiyang violation.
Paglilinaw niya man an ligtas na sa pagkakaigwa nin kaso an mga violator na nagsettle kan saindang violation alagad kun enkaso mautro giraray an pag-violate kaini an madudugangan an saindang penalidad.
Nagtao man nin kasuguan sainda an Alkalde na ipa-otob an maximum tolerance sa mga violator huli ta mga tawo man sana ini alagad an problema sana iyo an nagbabayolar sinda sa ordinansa.
Pighayag pa ni Balbin na antes makabayad nin penalty an sarong violator an mapasiring muna ini sa City Health Office Smoking Cessation Clinic nganing magsairarom sa Brief Tobacco Intervention nganing tabangan asin enganyaron an mga ini na magbagong buhay.
