Gadan an sarong 21-anyos na construction worker makalihis na malunod mantang pigporbaran na isalbar an tsinelas kan saiyang katrabaho na inanod sa salog sa Barangay Lintic, Banayoyo, Ilocos Sur.
Susog sa report hale sa Banayoyo Municipal Police Station (MPS), residente kan nasabing barangay an biktima.
Nangyari an insidente mantang yaon sa Binnuyog Bridge an biktima kaiba an nagkapirang katrabaho.
Segun sa mga nakahiling, bigla na sanang inagaw kan saro sa saindang pag-iriba na sarong 17 anyos na soltero an tsinelas kan saro pang kaiba asin itinapok sa salog.
Naglangoy sa tubig an biktima ngani na bukudon asin kuwaon an inanod na tsinelas, alagad dae na ini nakahale makalihis na inanod man kan makusog na bulos kan salog.
Nagprobar an mga katrabaho na hanapon asin iligtas siya alagad dai nanggad siya nakuwa sa lugar kan insidente.
Tulos man na nagkondusir nin retrieval operation an Banayoyo MPS katuwang kan BFP asin CDRRMO kan Candon City.
Pirang oras makalihis an insidente, nakuwa an bangkay kan biktima sa riverbed sa Barangay Langlangca 1st, Candon City.
Tulos man na dinara an biktima sa Candon General Hospital sa Barangay Tablac, Candon City, alagad idineklarang dead on arrival kan mga doktor.
