LEGAZPI CITY – Magsasagibo nin imbestigasyon an Municipal Environment and Natural Resources Office kan Virac, Catanduanes mapadapit sa suminadsad na barge sa kadagatang sakop kan Barangay San Vicente.
Segun ki MENRO Virac Chief Andy Po sa intrevista kan Bombo Radyo Legazpi na huli sa raot kan panahon kan nakaaging aldaw na sinabayan pa kan makusog na duros asin alon an nagresulta ini sa pagkaraot kan anchor chain kan tugboat asin barge kun kaya dae na ini na-control asin nadara na sana ini kan alon na suminadsad sa naunambitang barangay.
Nakatalaan man sindang magsagibo nin assessment kun may nasadsadan o nadistroso na mga coral reefs sa mga pig-agihan kaini kan pig-aanod ini pasiring sa naunambitang barangay.
Alagad paglilinaw niya na dae pa sinda makakasagibo nin pagsisid huli ta nagtetenir na malabog pa an tubig kan pigsususpetyahan na nadistrosong mga corals.
Sa hiling man kan opisyal an mapapagalan na halion sa lugar an barge huli sa magapong parte kan area asin nasa ibabawon na parte na ini kan dagat na kun sain man mas lalo pa suboot ining ma-ibabaw urog na kun low tide.
Pig-iimbestigaran man ninda kun may nangyaring kapabayaan sa lado kan tugboat o kun talagang dae na kinaya kan anchor na nagin kawsa kan insidente mantang nakikipag-koordinar na man sinda sa coastguard nganing imbestigaran man an tugboat.
Sa presente an pighahalat na ninda an pagkalma kan panahon asin paglinaw kan tubig nganing maponan na an imbestigasyon mapadapit sa naunambitang insidente.
Pagdoon pa ni Po na dae sinda matugot na dae mapanimbag an kagsadiri kan tugboat asin barge enkasong magluwas sa imbestigasyon kun may naraot sindang coral reefs.
