LEGAZPI CITY-Magtatabangan an Department of Transportation (DOTr) asin an Philippine National Police Criminal Investigation and Detection Group (PNP CIDG) ngani maikasa an imbestigasyon mapadapit sa paggadan kan sarong Special Action and Intelligence Committee for Transportation (SAICT) enforcer sa Cavite.
Segun kay Transportation Secretary Vince Dizon, binadil an biktima sa laog mismo kan saiyang pigteniran sa Cavite kung sain padagos na inaaram kan mga otoridad an motibo sa likod kan krimen.
Segun pa sa kalihim, habu niya muna pangenotan an imbestigasyon huli sa ngonian dai pa aram kung ano an posibleng rason sa paggadan sa enforcer.
Pigsierto man ni Dizon na nagpapaabot sinda nin tabang sa pamilya kan biktima mantang nagpapadagos an imbestigasyon sa kaso.
Mientrastanto, padagos man an pigsasagibong imbestigasyon kan duwang ahensiya ngani mapakaskas an pagresolba kan kaso asin matawanan nin hustisya an pamilya kan biktima.
