LEGAZPI CITY – Karsel an bagsak kan sarong security guard kan Tiwi Local Government Unit makalihis an kasong nagibo 13 taon na an nakaagi.
Segun ki Tiwi Municipal Police Station Investigator Police Executive Master Sergeant Raul Borlandan sa intrevista kan Bombo Radyo Legazpi na isinunad an mandamiento de aresto ki alyas Roger, 50 anyos, asin residente kan naunambitang munisipalidad.
Susog sa isinumite sa sainda na blotter napag-araman na nanghabon ini nin cable wire na naka-install sa sarong lugar kan taong 2009 kan dae pa ini nagtatrabaho sa Tiwi LGU.
Kan oras na mahiling suboot ninda an mandamiento de aresto sa suspek an dali-dali sindang nagpasiring sa residensya kaini nganing isunad ini saiya.
Pigtaram pa kan nasabing imbestigador na sa kagayunan suboot an dae man nanlaban an suspek huli ta mawot niya man hampangon an isinunad saiyang kaso nganing malinig na an saiyang pangaran.
Mahahampang an suspetsado sa pagbalgar sa Article 308 kan Revised Penal Code o kasong theft asin may itinalang piyansa na nagkakantidad nin P40,000 para sa saiyang temporamenteng libertad.
Sa presente an nasa kustodiya na kan Tiwi Municipal Police Station si alyas Roger nganing ihampang sa korte para sa magkakanigong proseso.
Pangapodan ni Borlandan sa mga naggigibo nin mga mararaot na gawi na magtrabaho na sana sinda nin marangal nganing malikayan an pagkakabagsak sa karsel.
