LEGAZPI CITY-Pighayag kan Department of Justice na kaipuhan pa muna isairaraom sa paganalisar o forensic examination an narekober na sako na igwang laog na suboot mga tulang nin tawo.
Makalihis ini kan isinagibong initial technical site assessment sa Taal Lake kan ahensiya katuwang an Philippine National Police asin Philippine Coast Guard.
Segun sa ahensiya, an sunod na lakdang, iyo an pormal na sertipikasyon na makakapagsabi na totoong mga tulang nin tawo an nakua sa nasambitang taal, na isasagbo kan Philippine National Police Cybercrime Investigation and Detection Group o kan National Bureau of Investigation.
Kaipuhan man suboot magsagibo nin DNA testing ngani mabisto kung igwang koneksiyon o matugma ini sa isa sa mga pamilya kan mga nawawarang sabungero.
Pighayag man kan National Bureau of Investigation na handa sindang magtao nin tabang asin asiste sa pigsasagibong paganalisar.
Segun man kay NBI Spokesperson Atty. Ferdinand Lavin, an opisina an maghahatod kan ‘forensic support’ enkaso pormal nang hagadon an saindang tabang.
Magigirumduman na an pagsasagibo kan technical site assessment o diving operation sa parte kan Taal Lake, kasunod kan pagtuga kan testigo na digdi suboot nakalubong an mga nawawarng sabungero.
Sinabi man ni Justice Secretary Jesus Crispin Remulla na an imbestigasyon na pigsasagibo, iyo an sarong proseso kung sain dakol suboot sindang madidiskobre.
