LEGAZPI CITY – Nagpa-otob nin 5% discount sa mga waterbill an Legazpi City Water District para sa saindang miembros konsumidores na mga senior citizen.
Segun ki Legazpi City Water District General Manager Rico Salazar sa intrevista kan Bombo Radyo Legazpi na haloy na nindang pigpapaotob an programa alagad nahiling nindang diit sana an nag-aaprobitsar digdi.
Kaipuhan sana magfill-up nin application form asin magsumite nin proof of age, proof of registration and bidding, asin dapat nakapangaran an account sa sarong senior citizen an account nganing ma-avail an naunambitang discount.
Paglilinaw niya na madepende man liwat sa konsumo kan saindang konsumidores kun makakakuwa an mga ini nin diskwento.
Pigtaram pa kan opisyal na bako man abilable an 5% discount sa mga waterbill sa mga government offices, business establishment asin irigwa nin negosyo na may kinaaraman sa tubig.
Nagsasagibo man sinda nin pag-update kada taon kan saindang records nganing madeterminar kun siisay an mga nagkukuwa nin discount asin sa mga account bako na active.
Mientrastanto, pighayag man ni Salazar na plano man nindang magkrear nin e-payment nganing dae na magbyahe an saindang miembros konsumidores pasiring sa saindang ofisina.
