Gadan an sarong 21-anyos na lalaki makalihis maligis nin tren sa Libmanan, Camarines Sur.
Sa intrevista kan Bombo Radyo Naga ki PSMS Juan Batolina, PIO kan Libmanan Municipal Police Station, sinabi kaini na bago mangyari an insidente, nagkaigwa nin dae pagkakasinabutan an biktima asin an saiyang tugang.
Segun sa opisyal, nabigla an dae pinangaranan na biktima sa sinabi kan saiyang tugang na rason kun nyata ta grabe an pagkaribong kaini kaya nagluwas ini sa saindang harong.
Katakod kaini, mantang naglalakaw sa riles kan riles, dae suboot kaini nareparo an nagdadangadang na tren, na nagresulta sa nasabing aksidente.
Nagluluwas sa inisyal na imbestigasyon sa insidente na nakaladkad kan tren an biktima asin itinapok nin limang metros an rayo sa kinamumugtakan kaini.
Huli kan insidente, nagsapo nin seryosong lugad sa manlaen laeng parte kan saiyang lawas an biktima na nagresulta sa tulos kaining pagkagadan.
Mientrastanto, huli sa biglang pagsulpot kan bictima sa riles, dae suboot nakapreno an driver kan tren.
Sa ngonian, liwat na nangapodan si Batolina sa mga residente na naka-istar harani sa riles kan tren na doblehon an saindang pag-iingat tanganing maibitaran an kaparehong insidente.
