LEGAZPI CITY-Uminabot na sa 43 katawo, kairiba na an 15 jovenes an kumpirmadong nagadan makalihis na an mapinsala na pagbaha sa Central Texas kan nakaaging aldaw segun iyan sa mga opisyal kan ciudad.
Makapagrehistro man nin maabot sa 850 na katawo na naebakwar mantang dose-dosenang iba pa an padagos na pinaghahanap.
Pinakamatindi na tinamaan an Kerr County makalihis na bumuhos an nasa 38 centimeter na uran na nagpaapaw sa Guadalupe River na uminabot sa 29 inches an taas kan tubig.
Kairiba pa sa mga nawawara an 27 na mga aking babae hale sa Camp Mystic summer.
Segun sa lokal na pamahalaan, piglalaoman pa an paghalangkaw kan numero kan mga nagadan mantang nagpapadagos an paghahanap.
Mientrastanto, 17 katawo man an nairehistro na nagadan sa Travis asin Kendall counties.
Piglalaoman man ni Texas Governor Greg Abbott kan federal disaster declaration na tutukan an saindang mga operasyon.
Nagpaabot na man nin pakikidamay si U.S. President Donald Trump asin sinabing matabang an pamahalaan sa pangangaipohan kan mga apektadong residente.
Pigsisi man kan nagkapira sa dating pamunuan kan National Oceanic and Atmospheric Administration (NOAA) an kakulangan nin bastante asin babala, asin an kakulangan kan mga tawohan na nagresulta sa budget cuts kan administrasyon ni Trump.
