LEGAZPI CITY – Ipinaluwas kan provincial government kan Catanduanes an primerong executive order mapadapit sa paramientras na pagpapapundo kan gabos na quarry operation sa lugar.
Segun ki Catanduanes Governor Patrick Azanza sa intrevista kan Bombo Radyo Legazpi na ipinaluwas niya an nasabing kasuguan nganing masawata an suboot korapsyon na nangyayari sa mga operasyon kaini.
Paliwanag niya na may mga naresibi siyang report na pighahagadan nin P100,000 kan dae niya na pinangaranan empleyado kan saindang kapitolyo na konektado sa sarong politiko nganing nagkaigwa nin permit sa pag-quarry asin an iba an naglalagpas na sa ipigbugtak na limit sa saindang permit.
30 pesos per cubic meter sana suboot an nakaresibo na pigbabayadan na napapaduman sa provincia mantang 100 pesos per cubic meter man an napapaduman sa bulsa kan sarong kandidato bilang lagay o suhol.
Pigtaram pa kan opisyal na bago siya magtukaw an pigparikas an ginibo kan mga ini na pagkolekta nin mga aggregates sa quarry asin itinambak sa kun sain na lugar sa provincia kun kaya an iba an gare na bulod sa sobrang halangkaw kan itinambak.
Irigwa man suboot na natawan nin permit alagad warang environmental clearance asin bako fully complied nganing magawadan nin permit mantang an iba an may nangyayaring “close-open scheme” kun sain maski ipinasarado na ini an nagpapadagos man liwat an operasyon huli sa mga ipigtatao kan mga ini na kwarta sa backman kan sarong politiko.
Pagdoon ni Azanza na mawot niya man sanang magin patas sa pagseserbi asin aramon an katotohan nganing magibuhan nin pagtatama urog nang kadakol nang mga residente an nag-aagrangay mapadapit sa haros dae na nakakapagsira huli sa mala-putik na dagat.
