Ipigbubusol kan sarong mambabatas an pagtatao nin P1,000 monthly allowance sa gabos na mga estudyante sa enterong nacion.
Isinunad ni Batangas 1st District Representative Leandro Legarda Leviste an saiyang enot na propwestong ley ngonian na 20th Congress.
Sa irarom kan House Bill No. 27, makakaresibi nin P1,000 na bulanang allowance an gabos na mga estudyante poon kindergarten sagkod kolehiyo, anoman an estado kan saindang buhay.
Obheto kan propwestong ley na makatabang sa pagkaon, transportasyon, asin iba pang gastuson sa pag-aadal, malikayan an pag-absent sa klase asin nganing mapakarhay an academic performance kan mga estudyante.
Nakasaad man sa propwestong ley an pagkakaigwa nin mga donasyon asin iba pang funding sources nganing suportaran an national student allowance program.
