LEGAZPI CITY – Nakatalaang tawanan nin tabang asistensya kan Philippine National Railways an lalaking naputulan nin bitis makalihis maligis kan saindang tren.
Magigirumduman na nangyari an insidente sa Barangay 16 Washington Drive, Legazpi City kun sain napag-araman na nasa impluwensya kan arak an biktima.
Segun ki Philippine National Railways General Manager Engineer Deovanni Miranda sa intrevista kan Bombo Radyo Legazpi na makalihis an nangyaring insidente an tulos sindang nakipagkoordinar sa saindang finance department kan saindang ahensya nganing makatao nin tabang asistensya sa nasabing indibidwal.
Kaiba suboot sa asistensya na ipigtao iyo an pangangaipuhanon kan biktima arug na sana kan bulong na para sa pagpaparahay kaini.
Pigtaram pa kan opisyal na tapos na an isinagibong imbestigasyon kan saindang ofisina asin kan Philippine National Police.
Sa ibong kaini an nangapodan siya sa mga nagtetenir sa gilid kan riles na permihang mag-ingat urog na kun nadadangog na an busina kan tren huli ta dae ini nakakapreno tulos asin nganing maibitaran na an mga insidente nin pagkaligis.
Pagirumdom man ni Miranda na dae pag-habunon an pigbugtak na railways crossing sign huli ta dakulang lyabi ini nganing maisalbar an buhay kan mga nagbabalyong behikulo asin tawo sa mga riles.
