LEGAZPI CITY – Padagos an pigsasagibong lakdang kan Land Transportation Franchising and Regulatory Board Bicol nganing matabangan an sektor kan transportasyon na labing naapektaran kan bigtime oilprice hike.
Segun ki LTFRB Bicol Director Joel Defeo sa intrevista kan Bombo Radyo Legazpi na warang patod an saindang pagdidistribwer kan mga fuel subsidy cards sa mga cooperatiba nganing magamit na kan mga jeepney drivers asin operator mantang may naka-alokar na suboot kan taong 2024 kun kaya marikas tulos sindang naka-antisipar sa nasabing programa.
Alagad may duwang rason siyang nahihiling kun kaya kadakol an presenteng wara pang cards huli ta pwedesir suboot na binakal ninda an mga unit kan jeep sa dating benipisyaryo kan nasabing programa asin posible man na kulang o sala an mga rekisitos na isinumite kan mga operator sa saindang ofisina.
Sa ibong kaini an nagsasagibo na sinda nin mechanism asin nakikipagtabangan sa mga kooperatyiba nganing maparikas an saindang pagbabarewas kan fuel subsidy cards.
Paglilinaw man kan opisyal na an ibang cards an may laog na asin an iba an wara pa alagad syerto man suboot na maabot an saindang subsidiya sa lalong madaling panahon.
Pig-aadalan ninda kun pano magkaigwa nin special fare rate sa rehiyon huli sa labing pagtaas kan presyo kan produktong petrolyo.
Pwedesir man suboot magsunad nin petisyon an mga transport group nganing mapagdesisyunan na an taas pasahe sa mga pampublikong transportasyon.
Pangapodan ni Defeo sa sektor kan transportasyon na sa ibong kan bigtime oil price hike an dae nanggad magsingil nin halangakaw na pamasahe sa mga pasahero na warang aprubadong kasuguan kan saindang ofisina asin ipaotob an proper discount sa mga estudyante, senior citezen, bados asin persons with disability.
