LEGAZPI CITY-Nagka-uyon an Department of Energy (DOE) asin mga representante kan downstream oil industry na pag-olayan an sarong “staggered” o luway-luway na implementasyon kan paghalangkaw kan presyo kan mga produktong petrolyo.
Ini bilang kasimbagan sa paghalangkaw kan presyo kan petrolyo sa bilog na kinaban huli sa nag-oorog na tensyon sa Middle East kabali na an Israel asin Iran.
Segun ki Department of Energy Officer-in Charge na si Sharon Garin, katuyuhan kan lakdang na ini na mabawasan an biglang epekto kan paghalangkaw kan presyo urog na sa sektor kan transportasyon asin agrikultura.
Nangapudan man an ahensiya sa mga kumpanya na palawakon an pagtao nin diskwento sa gasolina sa sektor kan transportasyon ngani mapag-olayan ini nin tama sa maabot na Hunyo 25.
Sinabi ni Undersecretary Alessandro Sales na an speculative trading asin bako an aktuwal na kakulangan nin suplay, iyo an mayor na rason kan paghalangkaw kan presyo kan mga produktong petrolyo.
Sa presente, an average na presyo kan petrolyo sa nacion iyo an, P55.90 kada litro sa Gasolina, P53.40 kada litro sa Diesel, asin P70.22 kada litro sa Kerosene.
Mientrastanto, makikipag-olay man si Garin sa Department of Transportation asin Department of Agriculture sa maabot na Hunyo 24, ngani na mag-andam nin posibleng subsidiya para sa mga drayber asin paraoma enkaso maglampas sa $80 per barrel an presyo kan gasolina.
Nangapudan man an nasambitang ahensiya sa publiko na magtipid sa konsumo sa paagi kan carpooling, tamang tamang maintenance kan lunadan, asin pag-iwas sa idle na makina.
