LEGAZPI CITY-Tinugutan na magbalik an haros 900 na mga evacuees na enot na naibakwar huli sa sunod-sunod na pagtuga kan bulkang Kanlaon.
Base sa opisyal na report, nasa total na 254 na pamilya katumbas sa 897 katawo an tinugutan na mag-decamp asin magbalik sa saindang mga harong, kasunod kan rekomendasyon kan Disaster Risk Reduction and Management Council (CDRRMC) kan ciudad kan Canlaon.
Nagtetenir man an mga nasabing pamilya sa manlaen-laen na evacuation centers hale sa La Carlota City South Elementary School II, La Carlota North Elementary School, asin La Carlota City College-Cubay Campus.
Kasabay kan saindang pagbalik sa saindang mga harong, tinutugutan man an saindang mga aki na makabalik sa face-to-face classes.
Sa ibong kaini, maabot sa 64 na pamilya o katumbas kan 232 na indibidwal an matenir pa man giraray sa evacuation center sa Canlaon City huli sa apektado an saindang mga harong kan direktang huma kan bulkan.
An saindang mga harong nasa laog kan itinalaan na danger asin expanded danger zone.
Padagos sindang makakaresibe nin tabang hale sa gobierno, mantang nagdadanay sa mga evacuation centers.
