Legazpi – Nakisumaro an siyam na mga MSME’s o Micro Small and Medium Enterprises sa nagpapadagos na ProPak Asia 2025 na ginigibo ngunyan sa Bangkok International Trade and Exhibition Centre sa Bangkok Thailand.
Sa intrevista kan Bombo Radyo Legazpi kay Joseph Rañola, an Assistant Regional Director kan DTI Bicol, magdudurar an aktibidad antes ngunyan na aldaw na kun sain pinartisiparan ini nin mga exhibitors hale 14 nasyon kaibanan na an Singapore, Australia, China, France, Italy , Japan , Indonesia asin Malaysia.
An naunambitang event an nagoopresir nin manlain lain na exhibits, technical training sessions asin industry webinars.
Naging padipisilan man para sa DTI Bicol an pagpili nin mga MSME’s huli na man sa limitado sana an mga partisipantes para sa naunambitang aktibidad.
An mga partesipante hale sa Bicol an exposed sa state-of-the-art technologies sa Automation, sustainable packaging, asin production efficiency na kun sain ini an saro sa mga kritikal na aspeto para sa pag-uswag asin para makasabay sa industriya sa bilog na kinaban an mga produkto hale sa Bicol.
Mientras tanto naglalaom man an opisyal na dakulang tabang man ining aktibidad para sa pag-uswag sa mga negosyo oras na iadaptar an mga nanuodan kan mga MSME’s sa naunambitang aktibidad.
