LEGAZPI CITY – Nahihiling na rason kan grupo nin mga driver an kakulangan sa kaaraman kan mga tsuper pag-abot sa safety asin policy sa mga kalsada.
Segun ki Basta Driver Safety Enforcer Chairman Ronel Nebres sa intrevista kan Bombo Radyo Legazpi, saro sa pinaka importante na maaraman kan mga driver sa paagi nin mga seminar an mga basic safety asin policy pag-abot sa mga kalsada ngani maibitaran an mga aksidente.
Katakod kaini an tamang pagsunod sa mga traffic signages sa mga aagihan na tinampo, arog kan pag slow down sa tamang kilometro asin an paghihiling kun may mga warning na nasa danger zones an mga agihan na ini.
Naoobserbaran man na dakol sa mga driver an nagmamaneho nin warang lisensya asin nagoover-speeding.
Saro pa ini sa mga nahihiling na rason sa mga manlaen-laen na aksidente sa rehiyon kan Bicol ngunyan na taon.
Mientrastanto, pigaram pa kan mga awtoridad kung nasa mechanical or human error an nagkakawsa nin mga aksidente sa mga kalsada.
Pagirumdom man kan safety officer na i-check an mga behikulo bako magmaneho asin i-check man kan mga driver an saindang kondisyon mismo ngani makapag-maneho nin normal.
