LEGAZPI CITY—Nadukayang wara nang buhay kan mga otoridad an sarong parasisira sa Barangay Sagrada, Bagamanoc, Catanduanes.
Segun ki 2nd Mobile Force Company Assistant Team Leader Police Staff Sergeant Gelmar Dumantoy, sa intrevista kan Bombo Radyo Legazpi, na nag-report sa saindang opisina an agom kan nasabing biiktima kun saen sinabi kaini na an saiyang agom an wara sa saiyang piglulunadang palataw-lataw na bangka.
Tulos man na nagkundusir nin search and rescue operation an mga otoridad kaiba an mga opisyales kan barangay kun saen inabot nin duwang oras an saindang paghahanap sa biktima.
Nahiling kan saro sa saindang rescuer na palataw-lataw na an lawas kan biktima sa gilid kan gapo sa nasambitang kadagatan asin tulos man ninda ining nirespondehan.
Sinabi man kan opisyal na wara nang buhay an biktima huli na man ta nananagas na an saiyang lawas kan ini madukayan.
Basado man sa findings kan doktor posibleng inatake sa puso an biktima na rason kan saiyang pagkagadan.
Sa presente, nai-turn over na an hawak kan biktima sa saiyang pamilya.
Makalihis an nangyaring insidente nagpagiromdom an saindang opisina sa mga parasisira na dapat may kaiba sinda sa pagsisira nganing dae na mautro an siring na insidente.
