LEGAZPI CITY – Pighihiling na rason an kakulangan nin impormasyon asin kaaraman sa kakalsadahan kun kaya nagdakol an mga nairehistrong aksidente sa banwaan nin Polangui, Albay.
Segun ki Polangui Emergency Medical Service – Quick Response Team supervisor Christopher Encisa sa intrevista kan Bombo Radyo Legazpi na pwedesir na dakol an nag-agi sa pig-aapod na fixer kun kaya dae na nag-aagi an mga mawot magka-lisensya sa paglaog sa mga driving school nganing makanuod mapadapit sa mga traffic rules.
Posible suboot na minimal sana kuta an nangyayaring aksidente kun may bastanteng kaaraman an mga driver mapadapit sa mga regulasyon sa mga kakalsadahan.
Mientrastanto, pighahandaan man ninda an nagdadangadang na ka-fiestahan sa saindang banwaan huli sa pagruso nin mga turista asin motorista na pwedesir mauli sa aksidente kan mga ini.
Dakulang pasalamat man ninda sa saindang gobierno lokal huli ta dae sinda pigpapabayaan sa saindang mga pangangaipuhan nganing makatao sana sinda nin tabang sa saindang namamanwaan.
Padagos na pagirumdom ni Encisa na enkasong may mahiling na aksidente, inuton muna suboot na magkoordinar sa sainda bago magkuwa nin mga dokumentasyon asin mga videos nganing tulos ninda ining marespondehan.
