LEGAZPI CITY – Kina-imbweltuhan kan 3 motorsiklo an saro na namang bagong aksidenteng nairehistro sa Barangay Ubaliw, Polangui, Albay.
Segun ki Polangui Emergency Quick Response Team Christropher Encisa sa intrevista kan Bombo Radyo Legazpi na sa ibong kan saindang pauru-utro na pagirumdom, nagkakaigwa man liwat nin aksidente sa saindang banwaan.
Base man sa inisyal na imbestigasyon na isinagibo kan mga otoridad, magkakaiba an direksyon na pigbabaybay kan tulong indibidwal na imbwelto sa banggaan.
Pigsususpetyahan suboot na may nakainom o nasa impluwensya nin arak sa saro sa mga driver kan nangyari an banggaan.
Pigtaram pa kan opisyal na nagsapo nin mga manlain-lain na menor na lugad sa hawak an duwa sa mga imbwelto mantang dinara man sa ospital an saro huli sa pigsapo na mayor na lugad sa saiyang hawak.
Poon suboot na maglaog an bulan nin Hunyo, uminabot na sa anom na vehicular accident sa saindang banwaan an saindang nairehistro.
Kun susumahon, haros urualdaw nang nagkakaigwa nin aksidente sa saindang banwaan asin posibleng huli sa behikulo o sa driver mismo an nagigin problema sa mga ini.
Sa presente, nag-iisip na an grupo ninda Encisa nin paagi kun papano maibitaran an marikas na pagpapadalagan kan mga driver kan saindang mga behikulo sa oras na mag-agi na an mga ini sa saindang banwaan.
