LEGAZPI CITY—Arestado an duwang most wanted person sa magkasuway na mga operasyon kan kapulisan sa banwaan kan Aroroy, Masbate.
Segun ki Aroroy Municipal Police Station Deputy Chief of Police Police Captain Antonio Padilla, sa intrevista kan Bombo Radyo Legazpi, binisto an saro sa mga naarestar na pigkonsiderar na Rank No. 1 Municipal Most Wanted Person na si alyas “Bimboy”, 21-anyos, sarong joven, paraoma asin residente kan Brgy. Macabug kan nasambitang banwaan.
Naarestar an suspek huli sa ipinaluwas na mandamiento de aresto kan Regional Trial Court Branch 47, Masbate City para sa kasong murder.
Sa presente, nasa kustodiya na kan Aroroy MPS si alyas “Bimboy” para sa magkakanigong disposisyon.
Afuera digdi, naarestar man si alyas “Jess”, na pigkonsiderar na Number 2 Municipal Most Wanted Person kan Aroroy, Masbate.
An suspek sarong 31-anyos, joven, gold panner asin residente kan Barangay Pinaanan kan kaparehong banwaan.
Naarestar ini sa ipinaluwas na mandamiento de aresto na inisyu kan Regional Trial Court Branch 48, Masbate City sa kasong rape.
Si alyas “Jess” an yaon na man sa kustodiya kan Aroroy MPS para sa magkakanigong disposisyon.
