LEGAZPI CITY – Maabot sa 20 behikulo an natawan nin ticket kan Public Safety Office huli sa ilegal parking sa kahalabaan kan Rizal Street, Legazpi City.
Segun ki Legazpi City Public Safety Office head Octavio Rivero sa intrevista kan Bombo Radyo Legazpi na pigtawan ninda ki aksyon an pangapodan sainda kan residente kan nasabing lugar asin naghagad na magsagibo nin clearing operation huli sa kadakol na ilegal na naka-parada na mga behikulo.
Sa saindang operasyon kaiba an Task Force Kalinigan asin Kaayusan sa nasabing tinampo hasta sa Barangay Bonot an afuera sa natiketan may mga na-clamp man na mga behikulo.
Dae man suboot nagkaigwa nin tensyon sa enterong operasyon kan saindang ofisina huli ta pig-eksplikar ninda na may presenteng ordinansang pigpapa-otob mapadapit sa illegal parking.
Pigtaram pa kan opisyal na mawot na nindang ipagpadagos urualdaw an clearing operation nganing maubos asin masawata an mga permihang agrangay kan publiko sa mga kakalsadahan.
Pagkatapos suboot ninda sa sentro kan ciudad an mapasiring sinda sa mga barangay sa Old Albay arug kan Barangay Tula-Tula asin Barangay Em’s Barrio.
Pigdoon niya man na warang pigsasalto an saindang ofisina maski pa mga behikulong kagsadiri kan gobierno an sainda ining titicketan kun ilegal ining nakaparada.
Abiso ni Rivero sa mga kagsadiri kan mga behikulo na saindang na-clamp asin na-isyuhan nin ticket na tubuson ninda sa City Treasurer’s Office huli ta pwedesir ninda isakat ini sa Prosecutors Office asin sa Land Transportation Office.
