LEGAZPI CITY—Duwang indibidwal an gadan makalihis na pagbabadilon sa Public Plaza, Barangay Danao, Balud, Masbate.
Segun ki Balud Municipal Police Station Chief of Police Police Major Hadrian San Antonio, sa intrevista kan Bombo Radyo Legazpi, binisto an biktima na sarong 42-anyos, lalaki, warang agom, self-employed, residente kan nasabing barangay.
Mantang an saro pang biktima binisto na sarong 48-anyos, babae, may agom, self-employed, residente kan Barangay Ilaya, Balud, Masbate.
Binisto an suspek na sarong 25-anyos, lalaki, warang agom, self-employed, asin residente kan Barangay Danao kan nasambitang banwaan.
Segun sa opisyal na nagkaigwa nin mainit na argumento an lalaking biktima asin suspek na nagresulta ngani na nagluwas ini nin badil asin nagpaputok nin tulong beses.
Dugang pa ni San Antonio na an babaeng biktima an nadamay sa insidente kun saen tinamaan ini sa may parte kan saiyang daghan.
Mantang an lalaking biktima an natamaan sa parte kan saiyang braso asin daghan.
Dinara pa an mga biktima sa ospital alagad dae na an mga ini naisalbar pa.
Nagbalong magtakas an suspek alagad huli sa pagkundusir nin hot pursuit operation kan mga otoridad sa pakikipagtabangan kan mga opisyales kan barangay asin lokal na gobierno.
Nakua man an pigtataguan kan suspek kun saen boluntaryong nagsurender ini sa mga otoridad.
Sa presente, nasa kustodiya na ini kan Masbate City Police Station asin posibleng mahampang sa kasong two counts of murder.
