LEGAZPI CITY – Pighayag kan Police Regional Office 5 na nagkaigwa nin pagbaba an nairehistrong 8-focus crimes sa kakatapos pa sanang 2025 Midterm Election kompara kan 2022 Presidential Election.
Segun ki Police Regional Office 5 Regional Director Police Brigadier General Andre Dizon sa intrevista kan Bombo Radyo Legazpi na basado sa saindang datos na nagrehistro nin kabilugang 659 insidente an naireport sa saindang ofisina poon January 12 hasta May 12, 2025 kompara sa 915 na insidenteng naireport sa kasagsagan kan pirilian kan taong 2022 na nagkaigwa nin 27.98% na pagbaba.
Dakulang tabang suboot sa pigkokonsidera nindang trayumpo an intensified police visibility asin an mabaskog na koordinasyon sa mga kapwa personel asin kan Commission on Election sa pagpapaotob na checkpoints.
Saro man sa lyabe an crime prevention strategy kan mga kapulisan huli ta nahihiling kan publiko na preparado an mga uniform personnel na tabangan sinda enkaso kaipuhan ninda ki asistensya.
Pigtaram pa kan opisyal na kompwesto kan 8-focus crimes iyo an Murder, Homicide, Physical Injury, Rape, Robbery, Theft, Carnapping of Motor Vehicle, asin Carnapping of a Motorcycle.
Padagos man an saindang warang patod na koordinasyon sa mga komunidad asin mga jovenes nganing mamantenir an pagigin ibaba kan nairerehistrong krimen sa rehiyon Bicol.
Pangapodan ni Dizon sa gabos na mag-ingat sa fake news, mapa transaksyon man o social media asin tulos na ipagtaong-aram sa mga kapulisan enkaso may nag-aaligid sa saindang palibot na kaduda-dudang tawo nganing masyerto an saindang kaligtasan.
