LEGAZPI CITY—Mahigot na babantayan kan Legazpi PNP an ipapaotob na liquor ban puon ngunyan na aldaw nin Domingo, Mayo 11, en koneksyon sa eleksyon sa Lunes, Mayo 12.
Segun ki Legazpi City Police Station Public Information Officer Police Executive Master Sergeant Carlos Paña sa intrevista kan Bombo Radyo Legazpi, na may mga direktiba na gikan sa PNP Regional Office 5 asin Police Provincial Office na magkundusir sinda nin pagpapatrolya sa ciudad kan Legazpi nganing maasigurar an sarong salbadong pirilian.
Sinabi kan opisyal na en kaso may manotaran na magbalgar sa liquor ban, siertong matatawan an mga ini nin magkakanigong penalidad.
Dugang pa ni Paña na preparado an saindang kapulisan na magsagibo nin magkakanigong lakdang kun magkaigwa man nin kariribokan durante kan pirilian.
Mientrastanto, pangapudan kaini sa publiko na magdara nin maiinom na tubig nganing maibitaran an dehydration sa ibong kan mainit na panahon asin imantenir an pagigin kalmado sa ano man na sitwasyon ngunyan na eleksyon.
