LEGAZPI CITY—Nag-deploy na nin kadugangang mga personahes an Coast Guard District Bicol sa mga stations asin substations sa bilog na rehiyong Bicol para sa nagdadangadang na eleksyon sa Lunes, Mayo 12.
Segun ki Coast Guard District Bicol, Coast Guard Ensign Alyzza Novie Bermal, sa intrevista kan Bombo Radyo Legazpi, may kabilogang labi sa 200 na mga personahes ninda an naka-deploy sa Bicol.
Mahihiling an nasabing mga personahes bako sana sa pantalan kundi pati na man sa mga eskwelahan sa bilog na rehiyon.
Sinabi pa kan opisyal na matabang an saindang mga personahes sa pagtao nin asistensya sa Commission on Elections (COMELEC) nganing magkaigwa nin matoninong asin maayos na pirilian.
Sa presente, nagtatabang na an mga ini sa pag-transport kan mga ballot box gikan sa pantalan pasiring sa designated schools na paggagamitan kaini.
Dugang ni Bermal na naka-heightened alert status na an saindang opisina sa gabos na pantalan nganing masierto na salbado asin maayos an sitwasyon kan mga biyahero.
Mientrastanto, pagiromdom kan opisyal sa publiko na magin alerto sa mga pigpapaluwas na anunsyo kan mga otoridad na may kinaaraman sa eleksyon para sa saindang seguridad.
