LEGAZPI CITY – Liwat na nakapagrehistro an nin mga aktibidad an Bulkang Bulusan sa nakalihis na magdamlag.
Segun ki Philippine Institute of Volcanology and Seismology Bulusan Volcano Observatory Resident Volcanologist April Dominguinao sa intrevista kan Bombo Radyo Legazpi na nakapagrehistro sinda nin 127 low-magnitude volcanic earthquakes sa laog nin 24 oras, sarong semana makalihis ma-eksperyensya an phreatic or steam-driven eruptions kan nakaaging April 28 asin 29.
Nagkaigwa man nin 800 tons per day na sulfur dioxide emmision asin katamtamang de-gassing na may langkaw na 100 meters asin napadpad sa southwest na direksyon kan bulkan.
Padagos man an paghubag kan bulkan asin nagtetenir sa alert level 1 na may tyansa na mautro giraray an sarong phreatic eruption.
Pigtaram pa kan nasabing volcanologist na kun pagbabasehan an mga historical erruption kan nasabing bulkan, mahihiling na kadaklan sa mga nairehistro an nagkaigwa muna nin kadakol na volcanic earthquakes antes an mismong pagputok kaini.
Alagad igwa man nin mga pagputok maski warang nairehistrong volcanic earthquakes kun kaya mas maray suboot kun maglikay an publiko sa paglaog sa 4km permanent danger zone asin sa 2km extended danger zone sa southeast sector kan bulkang bulusan.
Base man sa mga namonitor na mga datos an masasabi nindang nagkakaigwa nin aktibong nangyayari sa irarom kan bulkan.
Pighayag pa ni Dominguinao na padagos man an paglibot kan saindang quick response team sa pagkuwa nin impormasyon kan mga residenteng naapektaran kan abo kan bulkan nganing magamit an mga ini sa mga pagputok kan nasabing bulkan sa futuro.
