Uminabot na sa P10M an ofresir na pabuya para sa makakaturo sa lokasyon kan suboot co-mastermind sa kaso kan paggadan sa negosyanteng si Anson Que asin driver kaini.
Binisto ni PNP spokesperson Police Brigadier General Jean Fajardo an nasabing co-mastermind na si Wenli Gong na sarong Chinese national na midbid man sa ibang pangaran na Kelly Tan Lim, Bao Wenli, Axin, asin Huang Yanling.
Segun kay Fajardo, obheto kan nasabing pabuya na maparikas an pagkakadakop o pagkaka aresto kay alias Kelly .
Kun magigirumduman, enot nang inanunsyo kan PNP an P5M na reward money .
Naaraman na man kan PNP an kabilugang limang suspect sa kaso kan paggadan.
Tuo sa mga ini an presenteng nasa saindang kostodiya na kinababalehan ni David Tan Liao, Richardo Austria, and Reymart Catequista.
Padagos pa mang pinaghahanap kan mga otoridad sinda Jonin Lin asin alyas Kelly.
Si Kelly ay Lin an pigsasabing parehong mastermind sa paggadan kay Que asin driver kaini mantang an natatadang tulo an mga kasabwat.
