LEGAZPI CITY – Na-impound na kan Legazpi City Public Safety Office an imbweltong traysikel makalihis na magviral sa social media na sinakay sa ciudad kan Legazpi asin linibot sana hasta makaabot sa Daraga asin naningil nin halangkaw na bayad.
Segun ki Legazpi City Public Safety Office head Octavio Rivero sa intrevista kan Bombo Radyo Legazpi na dae man nagtugot an biktima na dae ma-impound an nasabing traysikel na duwang beses na palan na nareklamo sa saindang ofisina.
Kan inisyuhan nin ticket an nasabing driver, napag-araman na warang ining lisensya, wara man nin magkakanigong papeles an traysikel asin kolurom.
Pighahagad niya man sa Gobierno Lokal na dapat taasan an magigin penalidad sa mga traysikel driver na nagbabayolar sa mga ordinansa nganing dae na mag-urutro an mga ini.
Pigtaram pa kan opisyal na enkasong madakop giraray an nasabing traysikel asin an driver, itu-turn over na ninda ini sa pulis asin an Land Transportation Office na suboot an mataong penalidad.
Sa pag-oberba niya man, dakol na suboot an naresibe nindang reklamo mapadapit sa mga traysikel na nagpapasada sa ciudad na kolurom asin warang magkakanigong papeles.
Pagkatapos kan 2025 Midterm Election, magsasagibo man sinda nin clearing operation sa mga illegal terminal asin sa mga lugar na inukopa na nin mga illegal vendors.
Pangapodan ni Rivero sa mga traysikel drayber na dae maghagad nin halangkaw na pasahe sa saindang mga pasahero huli ta pwedesir mahampang an mga ini sa penalidad asin sa pagkakansela kan saindang lisensya.
