LEGAZPI CITY- Pigkokunsiderar na minimal sana an epekto kan pag-alaburuto kan bulkang Bulusan sa mga irrigation systems sa provincia kan Sorsogon.
Ini huli ta nakapag-ani na an kadaklan sa mga paraoma sa provincia antes pa an aktibidad kan bulkan.
Segun ki National Irrigation Administration Sorsogon and Masbate IMO Manager Engineer Edmundo Villaluz sa intrevista kan Bombo Radyo Legazpi na solamenteng an abo man sana an nakaapektar sa nasabing mga pasilidad.
Napag-araman na nasa anom na systems an apektado na tulos man na pig-aaksyunan.
Paliwanag kan opisyal na lilinigan an mga naghugpa na abo huli ta posible ining magtagas na garing semento.
Enkasong magtagas, pigkakahaditan na makabara ini sa pigbubulusan kan tubig asin maka apektar sa water distribution pag-abot kan wet season.
Dugang pa ni Villaluz na an mga irrigators association na an namamayo sa maintenance kan mga omahan asin nagtataong asistensya na sana an ahensya enkasong igwang mga major repairs.
