LEGAZPI CITY – Nakatalaang magsagibo nin clearing operation an Task Force Kalinigan at Kaayusan Legazpi City nganing masawata an mga ilegal vendors na pig-ookopa an nagkapirang pampublikong agihan.
Segun ki Task Force Kalinigan at Kaayusan Head Mark Andy Marbella sa intrevista kan Bombo Radyo Legazpi na isasagibo an nasabing operasyon katakod na man kan pinag-aatisiparan na maritime procession na komon na pigsasagibo tuyong bulan nin Mayo.
Pigtututukan man ninda an mga paratienda sa Legazpi Boulevard huli ta dakol na sindang nareresibeng reklamo mapadapit sa pagigin watak watak na pagpwesto kan mga ini na nagkakawsa man pagkawara kan mga pwedesir agihan kan publiko.
Kasabay man sa saindang aayuson an mga nagpapark kan saindang mga behikulo maski sain-sain na kakalsadahan sa ciudad na nagigin rason kan paggabat nin trapiko.
Piglinaw man kan opisyal na bako man sinda kontra sa mga nagtitienda asin naghahanap buhay kundi mawot man ninda na mahali an mga ilegal na nakapwesto nganing dae man sinda mahampang sa penalidad.
Kahagadan niya man sa mga ilegal na nagtitienda na dae na magbalik enkaso na-sita sinda sa saindang clearing operation kundi magsunod na sana sa ipina-otob na ordinansa kan lokal na gobierno.
Papasadahan man ninda sa saindang operasyon an mga lugar na pigdudumog kan publiko nganing matanggal an mga sagabal sa mga pampublikong agihan.
Pagirumdom ni Marbella sa publiko na ibitaran an pagkakaigwa nin double parking asin sa mga paratienda na dae magpwesto sa mga lugar na nakakasagabal sa pampublikong agihan.
