Ipinadara na kan India an pangduwa hale sa ikatulong batch kan BrahMos cruise missiles sa Pilipinas.
Segun sa report hale sa local newspaper sa India, bako arug kan naenot na battery na ipinadara sakay kan Indian Air force transport aircraft, ipinadara an ikaduwang missiles sakay kan barko.
An tulong BhrahMos missile batteries haleng India an alinsunod sa P18.9 billion na kasunduan sa pagultangan kan Pilipinas asin Indian-Russian joint venture na BrahMos Aerospace private limited company.
An pagpapadara man kan ikaduwang BrahMos missiles an makalihis an sarong taon poon kan makumpleto an delivery kan enot na batch kan nasabing missiles mantang nag abot an enot na BrahMos sa PH kan Abril 2024.
Kun kaya an Pilipinas an ikatulong nacion sa Southeast Asia na nagkaigwa kan ipigkokonsidera na pinakamarikas na supersonic antiship missile system, kasunod kan Indonesia asin Vietnam.
Magigirumduman, sa pagpirma kan kontrata kan Enero 2022, sinabi ni dating Defense Secretary Delfin Lorenzana na magtatao an BrahMos missiles nin deterrence capability sa PH laban sa anumang pagbabalong rauton an satuyang soberaniya partikular na sa West Philippine Sea.
An BrahMos medium-range supersonic missiles na kayang umabot sa 290 kilometers hasta sa 400 km an pwedesir ilunsar hale sa submarines, mga barko, eroplano o land platforms.
Ini an may rikas na Mach 2.8 o triple na mas marikas kesa sa speed sound na 3457.44 km/hr.
