LEGAZPI CITY—Nadukayan kan mga residentes an sarong kalansay nin tawo sa abandonadong lote sa Brgy. Marambong, Pandan Catanduanes.
Segun ki Pandan MPS COP PMAJ Juanito Tevar, sa intrevista kan Bombo Radyo Legazpi, na ini nahiling asin nakalot kan sarong construction worker sa abandonadong lote na nakatalaang gigibohon na barangay health center sa nasambitang lugar.
Sinabi kan opisyal na pig-imbestigaran na an insidente huli ta dae man pighali an posibilidad na baka an kalansay an saro sa mga posibleng pighahanap na nawawarang persona kan mga nakaaging taon sa kataning na mga lugar.
Sa presente, sinabi pa kaini na wara pa man na indibidwal an nag-aako kun may nawawara sindang kaparientes.
Alagad en kaso man na may mag-report, ipapadagos man liwat ninda an imbestigasyon ngani na maaraman kun ano talaga an nangyari digdi.
Mientrastanto, ipigdara na an kalansay sa crime laboratory sa forensic unit kan Catanduanes Police Provincial Office para sa skeletal analysis.
