LEGAZPI CITY – Padagos an pagkondusir nin mga programa kan Jovellar Bureau of Fire Protection katakod kan Fire Prevention Month.
Segun ki BFP Jovellar Municipal Fire Marshal Senior Fire Officer 4 Randy Rebua sa intrevista kan Bombo Radyo Legazpi na nagkondusir na man sinda nin fire safety lecture mapadapit sa fire prevention, fire drill asin earthquake drill bilang preparasyon sa mga emerhensya.
Nakatalaan man nindang isagibo an mga fire road show na mapoon sa Marso 15 sa apat na mga national high schools sa banwaan kaiba an Local Government Unit.
Obheto kan aktibidad an nganing maaraman kan mga estudyante an saindang gigibuhon enkaso magkaigwa nin mga untoward incident arug kan kasulo nganing malikayan an pagkakaigwa nin casualty.
Nahihiling man kaini na nagkakaigwa nin kamalayan an saindang nasasakupan sa kun papano makalikay sa kasulo na nagreresulta sa ibabang nairehistrong kasulo sa saindang banwaan.
Sa ibong kan sobrang init kan panahon, wara pa suboot na naiirehistro na kasulo an Jovellar sa enot na tulong bulan kan taon.
Nagsasagibo man sinda nin house to house inspection asin nakikipag-koordinar sa komunidad nganing magkaigwa nin kaaraman an publiko manungod sa fire protection and safety.
Pagirumdom ni Rebua sa publiko na dae pagbayaan an mga appliances asin charger na nakasaksak maski dae piggagamit nganing makalikay sa pagkasulo.
