LEGAZPI CITY – Nakaresibi an Albay Provincial Agricultural Office nin mga makinarya hale sa government agency na Philippine Center for Postharvest Development and Mechanization (PhilMech).
Segun ki Albay Provincial Assistant Agriculturist Daryl John Buenconsejo sa intrevista kan Bombo Radyo Legazpi na nagkaigwa na sinda nin turn-over ceremony sa pagultangan kan PhilMech asin kan sa Gobierno Provincial kan Albay.
Ipigtao sainda an agricultural machineries asin mga Rice Processing System na ipigtugdok sa Albay Rice Station nganing makapagtaong suporta sa mga paraooma.
Pigtaram pa kan opisyal na gagamiton an mga makinarya para sa rice production kan provincia siring man an kadugangang ekipahe sa saindang pasilidad.
Dakol na man suboot sindang naresibi nin tabang sa paagi kan pagdodonar nin ekipahe na gikan sa mga manlain-laing grupo.
Kadakol na man sindang mga programang pigbubusol mapadapit sa pag-ooma, pagtatanom, asin pagsisira siring man an validation ninda sa mga potential areas na pwedesir pang magamit pag-abot sa agrikultura.
Pagirumdom ni Buenconsejo sa mga paraooma asin parasisira sa provincia na pwedesir sinda magpasiring harani saindang mga Municipal o City Agriculture Office enkaso may kahapotan sinda na kaipuhan ipaabot sa saindang opisina.
.){kind=link}