Nakahanda na suboot an duwang self-confessed Davao death squad member na sinda Edgar Matobato asin Arturo Lascañas na hampangon si dating Presidente Rodrigo Duterte sa International Criminal Court (ICC).
An duwang self-confesed hitmen an piglalaomang matestigo asin iprepresenta kan prosecution team, oras na puonan na an hearing sa kasong crimes against humanity kan dating presidente.
Segun kay Fr. Albert Alejo, saro sa mga boarder board member kan international human rights organization na No Peace Without Justice, haloy nang pighahalat kan duwa na makahampang an dating presidente.
Sinda Matobato asin Lascañas an kapwa nasa ‘protective custody’ kan ICC alagad hasta sa ngonian, dae pa ipigpapaluwas an saindang lokasyon.
Segun kay Fr. Alejo, kapwa mga insider an duwa asin kabisado ninda an sistemang ipina-otob kan dating presidente sa saiyang mga kampaniya laban sa ilegal na droga poon kan alkalde pa siya sagkod kan nagin presidente kan Pilipinas.
Importante man suboot sa isasagibong paglilitis na igwang mga testigo na nag-ako kan saindang ‘involvement’ o pagkaka-imbwelto sa sarong krimen asin nakahandang sabihon an mga naaaraman o akuon an kasalan.
Magigirumdumang an duwang self-confessed hitmen an enot na mang tumestigo sa pirang serye kan pagdangog poon pa kan panahon na nanerbihan si Duterte bilang presidente kan Pilipinas.
.){kind=link}