LEGAZPI CITY—Pinahimutikan kan Tabaco City Police Station na warang katotoohan an nagsisirkular sa social media na panlulugos suboot sa manok sa Barangay Cobo sa ciudad kan Tabaco, Albay.
Segun ki Tabaco CPS COP PLTCol Edmundo Cerillo, sa intrevista kan Bombo Radyo Legazpi, na tulos ninda ining inimbestigaran asin napag-araman na an nahiling na underwear sa naglakop na ladawan, an bagong laba asin posible suboot na nahulog ini sa sampayan na harani sa manok.
Hiniling man kan saindang mga otoridad an manok asin sinabi na wara nin ano man na indikasyon nin panlulugos.
Dugang kaini na posibleng nagadan an manok huli sa natuka kaini an soft snail o an pig-aapod na “arakaak”.
Tinawan-duon kan opisyal na an nasambit na naglalakop na social media post an wara man nin katotoohan.
Sa ngunyan pig-aadalan pa kun ano an mga gigigibohong legal na aksyon laban sa nagpakalat kan nasambitang post.
Mientrastanto, nagpagiromdom ini sa publiko na dae tulos magtubod sa kun ano man na mga nagsisirkular na post sa social media, asin dapat na magtubod suboot sa mga resulta kan imbestigasyon na ipigpapaluwas kan mga otoridad.
