LEGAZPI CITY – Pigpapa-ubaya na kan Legazpi City Disaster Risk Reduction Management Office sa mga eskwelahan an pagpapa-otob kan suspensyon kan mga klase huli sa epekto kan naglalangkawan na heat index.
Segun ki Legazpi CDRRMO Officer in Charge Apple Armeña sa intrevista kan Bombo Radyo Legazpi na dae ninda pwede gibuhon na para sa gabos an pagdeklara nin suspensyon kan klase huli ta iba iba an sitwasyon kan kada eskwelahan arug suboot kan mga nasa southern barangay kompara kan mga nasa urban area.
May mga nagkapirang eskwelahan na man suboot na may mga aircon asin mga bentiladong mga klasrum na kayang i-manehar an problema kan heat index.
Huli suboot sa transition hale sa tag-uran pasiring sa tag-init asin an namamateang easterlies, nakapagrehistro sinda nin pinakahalangkaw na heat index sa 46 degrees celcius sa Legazpi City.
Paglinaw man kan opisyal na dapat makipag-koordinar sainda an mga eskwelahan kun magpapaotob nin localized suspension nganing marecord ninda an mga ini asin mamonitor.
Urualdaw man suboot na pigmomonitor kan saindang departamento an heat index maski bako mainit an namamatean sa ciudad.
Pagirumdom ni Armeña man kaini sa publiko na permihang maggamit nin payong kun maluwas saindang mga harong, magsulot nin light color na mga bado, likayan muna an pag-inom nin kape asin arak, asin pag-inom nin tubig nganing maibitaran an epekto kan heat index sa hawak kan sarong tawo.
