LEGAZPI CITY—Posibleng sa kulungan maselebrar nin Aldaw nin mga Puso an sarong lalaki makalihis na mapag-araman na may kaso ining pigkakahampang kan magkuang police clearance sa Legazpi City Police Station sa provincia kan Albay.
Segun ki Legazpi CPS PIO PEMS Carlos Paña, sa intrevista kan Bombo Radyo Legazpi, an suspetsado may kaso sa Metro Manila kun saen may ipinaluwas na mandamiento de arestado an Mandaluyong City Trial Court huli sa saiyang non-appearance sa kasong BP 22.
Ini may pigrekomenda man na piyansang kantidad P24,000 para sa saiyang temporaryong libertad.
Segun sa opisyal na an pangaran kan persona nagkaigwa nin ‘Hit’ sa saindang system kun kaya saindang ining pigberipikar liwat siring man an paghapot kun may pigkakahampang ining kaso.
Sa presente, nasa kustodiya ini kan Legazpi CPS asin dae pa man maabiso kun mapiyansa ini para sa saiyang temporaryong libertad.
