LEGAZPI CITY- Plano kan Albay Provincial Government na permanente nang ilipat sa resettlement site an mga residenteng nakaistar harani sa 6km permanent danger zone kan Bulkang Mayon.
Segun ki Albay Governor Grex Lagman, oras na maibalik na sa normal an sitwasyon sa provioncia hali sa pag-aalburoto kan bulkang Mayon, pag-aadalan an posibleng resettlement sa mga residente.
Alagad antes ini, kinakaipuhan na magkaigwa muna nin ley ngani na legal na mai-relocate kan gobierno an mga pamilya na nakaistar sa laog kan permanent danger zone.
Sinabi man kan gobernador na mahagad nin tabang hali sa Department of Human Settlements and Urban Development , Department of Labor and Employment (DOLE), Department of Agriculture (DA), asin Department of Agrarian Reform (DAR) ngani na maisakatupadan an relocation sa mga residente lalo pang pag-oma o pagtatanom an saro sa kabuhayan sa provincia.
Alagad dawa nakalatag na an evacuation protocols, nag-apelar an gobernador sa mga apektadong residente na magin bukas sa posibilidad na relocation sa mas salbadong lugar ngani na dae na kaipuhan na mag-ebakwar asin maulang an pagbuhay-buhay kada nagkakaigwa nin mga pag-alburoto an bulkang Mayon.
