LEGAZPI CITY – Pigpapaliwanag kan Supreme Court (SC) an Commission on Elections (Comelec) katakod sa isinangat na petisyon kan na-disqualify na gobernador kan Albay na si Noel Rosal.
Sa Supreme Court en banc resolution sinugo an COMELEC asin an nadaog na kandidato sa pagka-konsehal sa Legazpi City na si Joseph Armogila na magsumiter kan saindang mga komento sa petisyon ni Rosal.
Tinawanan sana kan Korte Suprema nin 10 aldaw an mga respondents ngani na isumiter an mga komento sa korte.
Enot nang pinagtibay kan COMELEC an nagin resolusyon kan first division na i-disqualify si Rosal sa katatapos na eleksyon kan Mayo 9, 2022.
Inireklamo ni Armogila si Rosal nin pagbayular sa Omnibus Election Code huli sa pagtao nin cash assistance sa mga senior citizen asin tricycle drivers dawa ipinagbabawal na sa ley na magluwas nin pondo huli ta panahon na nin kampanya.
Hinagad ni Rosal sa Korte Suprema na magpaluwas nin temporary restraining order o status quo ante ngani na magtenir bilang gobernador kan Albay asin magampanan an trabaho.
Mawot man ni Rosal na ipawarang saysay an mga nagin resolusyon kan Comelec na may petsang September 19, 2022 asin November 18, 2022 na nagdi-disqualify sa saiya na magdalagan bilang gobernador kan 2022 elections.
