LEGAZPI CITY – Hinagad kan grupo kan mga paraoma ki Presidente Ferdinand Marcos Jr. na ipapundo asin bawiun an permit para sa commercial propagation kan Golden Rice.
Sa intrevsita kan Bombo Radyo Legazpi ki Bantay Bigas spokesperson Cathy Estavillo, bilang Presidente asin Agriculture Secretary dapat na simbagan an ugat kan malnutrisyon sa nacion asin ibusol an mga policy reforms ngani na masolusyunan an kapobrehan asin kagutuman.
Tinawang duon kaini na an naeeksperyensyahang krisis ngonyan, resulta kan kawaran nin suporta kan gobierno sa sektor kan agrikutlura kaito pa man.
Iniluwas kan grupo an pahayag kasabay kan pagcomemorar kan ika-siyam na taon kan historikong paggabot kan golden rice hali sa sarong experimental farm na pinamayuhan kan Rice Research Institute (IRRI) asin PhilRice sa Camarines Sur.
Magigirumdumang Agosto 8, 2013, ginabot kan labi 400 na paraoma asin consumidores an tanom na golden rice bilang pagpapahayag nin mahigot na pagkontra sa nasabing ekspiremento.
Segun ki Estavillo, sarong impractical asin peligrosong eksperimento an nasabing lakdang na magdadara nin peligro sa mga paraoma asin salud kan Pilipino huli ta wara pa nin maray na pag-aadal dapit digdi.
Sa pirit na pagbusol kan golden rice, lalo sana suboot na papalalaon an halangkaw na presyo kan barakalon huli ta pirmi ng kakabit an halangkaw na cost of production.
Pinakasolusyon suboot sa naeeksperyenshang krisis an pagbuhos nin suporta kan gobierno sa sektor kan agrikultura na siertong mauuli sa positibong resulta.
Enot ng pinangaran kan DA an pitong provincia bilang mga lugar para sa golden rice experimentation na compuesto kan Quirino, Catanduanes, Antique, Samar, Maguindanao, Lanao del Norte asin Agusan del Sur.
