Saro sa mga suspek sa P30M robbery incident sa Pasig, nagsurinder sa Sorsogon

LEGAZPI CITY- Nai-turn over na sa kustodiya kan Camp Simeon Ola sa ciudad nin Legazpi an saro sa mga suspek sa nangyaring P30 milyon robbery incident sa Barangay Kapitolyo, pasig City makalihis na magsurinder sa Bulusan, Sorsogon.

Binisto an suspek na si Ruwel Galang, 36 anyos na kusang nagsurinder kay Vice Mayor Reuel Fortades kan Bulusan nganing ihayag an saiyang lado sa nangyaring panghahabon sa sarong Japanese national imbwelto an apat na suspek na mga pulis asin tolong iba pa.

Sa intrevista kan Bombo Radyo Legazpi kay Vice Mayor Fortades, suway sa mga nagluluwas na report, nilinaw suboot ni Galang na wara siya nin aram sa nangyaring panghahabon asin nagtatrabaho sana sa saiyang rent a car business.

Pagbuyagyag kaini na inarkila an saiyang kotse kan haloy ng customer na si Staff Sgt. Jayson Bartolome nganing magpahatod sa Pasig para sa pagseserbi nin warrant of arrest sa sarong drug suspect.

Alagad nabigla na sana suboot kan magdurulag na an pag-iriba na pigbabakay nin ibang pulis asin may tama na nin bala ni Bartolome.

Para sa saiyang seguridad asin huli naman sa mga nareresibing death threat, nagpasiring si Galang sa saiyang mga kaparientes sa Sorsogon saka na naghagad nin tabang sa Bise Alkalde nganing linigon an saiyang pangaran.

Segun kay Vice Mayor Fortades, tulos nindang dinara sa clinic si Galang huli ta nasa apat na aldaw na palan ining dae nakakapagsairarom sa dialysis asin pig-turn over naman sa mga pulis.

Sa ngunyan, nagsasagibo na nin imbestigasyon an mga otoridad sa bersyon kan testimonya kan suspek mantang inasegurar man kan Albay PPO an seguridad kaini.

Magigirumduman na Disyembre 18 kan tutokan nin badil asin sapiritang kuwaon kan mga suspek an nasa P31 milyon na kwarta sa vault kan mag-agom na biktimang sinda Joana Marie Flores Espiritu asin Kani Toshiro, na sarong Japanese National.

Naarestar man kan mga otoridad an apat na suspek na pulis na sinda Staff Sgt. Jayson Bartolome, Cpl. Merick Desoloc, Cpl. Christian Jerome Reyes, asin Pat. Kirk Joshua Almojera kaiba si AJ Mary Agnas.

Nagadan man makalihis na makipagbadilan sa mga pulis an saro pang suspek na si Jhon Carlo Atienza mantang padagos pang pinaghahanap an nakadulag na dating pulis na si Ferdinand Fallari.