LEGAZPI CITY – Naglalaom an bagong muknang media platform sa ciudad kan Legazpi na dakulang maitatabang kan grupo sa mga content providers sa online media ngani na ma-professionalize.
Sa intrevista kan Bombo Radyo ki Legazpi Online Broadcasters Association (LOBA) President Chris Tormes, pigmamawot kan grupo na mag-self regulate kan pioneers urog na wara pang eksistidong kaparehong organisasyon sa ciudad.
Inisyatiba naman ini mantang wara pang nairerehistrong reklamo kontra sa grupo asin makasimbag man nin magkakanigo kun igwa nang maresibe.
Sa duwang beses na hearing na ipigsagibo kan Committee on Information sa Sangguniang Panglunsod sa pamamayo ni Coun. Diego Obido, napag-araman na walo an may lehitimong operasyon.
Kasubanggi, nagkaigwa naman nin official meeting an LOBA asin napag-olayan an mga posibleng polisiya na imumukna na mabase sa code of ethics kan broadcasters.
Aminado si Tormes na dakulaon na angat an nasa abaga niya huli sa dakulang responsibilidad asin halawig na sakop kan online media mantang kritikal pa sa Cybercrime Law kun may remalaso.
Huli digdi, kaipuhan na magin responsable asin kwalipikado man an mga miembro.
Kinakaipuhan man munang magparehistro kan grupo sa Securities and Exchange Commission ngani na magin lehitimong organisasyon.
Paglilinaw pa ni Tormes, bako ining kakompentensiya kan mainstream media asin print kundi katabang sa pagbabariwas kan impormasyon.
